Kamanda wa Polisi mkoa wa Mjini Magharibi Mnguja Hassan Nassir, amemuagiza mkuu wa upelelezi wa wilaya ya mjini kufanya uchunguzi wa kina tukio la kijana aliyekutwa ndani ya kontena la mizigo katika bandari ya malindi Zanzibar.
Kamanda Nassir amebainisha hilo wakati akizungumza na Waandishi wa habari leo may 14, 2018 huko ofisini kwake Madema na kusema teari ametoa agizo kwa mkuu wa upelelezi wa wilaya ya mjini ili kujiridhisha na kile alichodai kijana huyo kuwa ni mvuvi, alijipumzisha ndani ya kontena hilo na kupitiwa na usingizi.
Kijana huyo aliye tambulika kwa jina la Hassan Juma Ali miaka 36 Mrangi wa Miembeni mjini Unguja amenusurika kufa baada ya kukaa ndani ya kontena hilo liliokuwa limejifunga kwa siku nne, aliokolewa jana akiwa hoi na kukimbizwa katika hospitali ya Mnazimmoja kwa matibabu.
Kamanda Nassir amesema wanasubiri hali yake itakapo kuwa nzuri waendelee na upelelezi na endapo itabainika Kijana huyo aliingia ndani ya kontena kwa makusudi watamchukulia hatua za kisheria.
Aidha ametoa wito kwa Wananchi kuacha kukaa katika mazingira ambayo yanahatarisha maisha yao.
